شاہانہ ناز

 شاہانہ ناز

فصیلِ جاں ہے کہ مقبرہ ہے

جہاں نہ آہٹ کوئی خوشی کی

رمق نہیں کوئی زندگی کی 

نہیں ہے چڑیوں کی چہچہاہٹ

نہ آبشاروں کی گنگناہٹ

نہ کان پڑتی صدا ہے کوئی 

نہ دردِ دل کی دوا ہے کوئی 

فصیلِ جاں میں تو چاروں  جانب 

کوئی بھی در ہے نہ ہے دریچہ 

جہاں سے تازہ ہوا گزر کر 

ہمارے دل کو سکون بخشے 

نہ طاقچہ اور چراغ کوئی 

کہ جس سے اندر کے گھپ اندھیرے

 میں روشنی ہو 

کوئی بھی ایسا خلا نہیں ہے 

جہاں سے دل کی صدا 

کسی کی سماعتوں تک رسائی پائے 

نہ در ہے کوئی کہ جو کھلے تو 

اسیرِ جاں یہ رہائی پائے

فصیلِ جاں ہے کہ مقبرہ ہے

unplash